Bamwe mu Bategetsi ba Buraya mu Rugendo muri Ukraine

Prezida w'Ubufaransa, Umushikiranganji wa mbere w'Ubudagi n'umushikiranganji wa mbere w'Ubutaliyano bari i Kiev ku murwa mukuru wa Ukraine.

Prezida w’Ubufaransa, Emmanuel Macron, yavuze ko urugendo rwabo ari ubutumwa bukomeye bw’ukwereka Ukraine ko bayishigikiye mu ntambara irimwo n’Uburusiya. Mu bo bitegekanijwe ko abo bategetsi babona, harimwo prezida wa Ukraine, Volodymyr Zelenskyy.

Urugendo rwa Prezida w’Ubufaransa, umushikiranganji wa mbere w’Ubudagi n’uw’Ubutariyano bihuriranye n’uko uno musi inama nshingwabikorwa y’umuryango w’ubumwe bwa Buraya iriko yiga ivy’ukwemerera Ukraine kwinjira mu muryango w’ubumwe bwa Buraya.

Hagati aho, ejo ku wa gatatu Amerika yatangaje ko igiye guha Ukraine uwundi muriyaridi umwe w’amadorali uzokoreshwa mu vya gisirikare.