Ukraine irasaba intwaro nyinshi OTAN, umuryango w'ubutabarane w'ibihugu bituriye amajyaruguru y'inyanja y'Atlantika.
"Nimuduhe intwaro zose dukeneye, twirwaneho, dutange ibitambo by'ubuzima bwacu, ariko intambara ntirenge Ukraine." Ni ko minisitiri w'ububanyi n'amahanga wa Ukraine, Dmytro Kuleba, yabwiye bagenzi be ba OTAN, bamutumiye mu nama yabo iteraniye i Buruseli mu Bubiligi. Yavuze, ati: "Naje kubasaba ibintu bitatu: intwaro, intwaro, intwaro. Nimuzitugezaho vuba."
Kuleba asa n'ugaya ibihugu bimwe na bimwe, atavuze amazina, bifite ingingimira, byanga guha intwaro Ukraine kugirango bititeranya n'Uburusiya.
Umunyamabanga mukuru wa OTAN, Jens Stoltenberg, yatangaje ko inama igomba gufata icyemezo cyo guha Ukraine cyane cyane intwaro zihanura indege n'izindi zo kurengera ikirere cyayo, intwaro zishwanyuza ibimodoka binini by'intambara, bita “chars” mu Gifaransa, bitamenwa n'amasasu.
Bamwe na bamwe mu banyamuryango ba OTAN, ku giti cyabo, baha intwaro Ukraine n'izindi mfashanyo zirimo iz'ubuvuzi. Ariko kuri Ukraine ntibihagije. Ariko ikigo ntaramakuru AP cyo muri Amerika kivuga ko OTAN, nk'umuryango, idafite ubwire bwo guha intwaro Ukraine, kubera impungenge z'uko byayishora mu ntambara ngali n'Uburusiya, ndetse bishobora no gutuma Uburusiya bukoresha intwaro za kirimbuzi (bombes atomiques mu Gifaransa). (VOA News)
=
Facebook Forum