Nk’uko umuvugizi w’impunzi n’abavuye mu byabo muri Darfur, Adam Rejal, n’abandi bantu b’impirimbanyi banyuranye babitangarije ibigo ntaramakuru bitandukanye, abarwanyi b’umutwe w’Abarabu witwara gisilikare witwa Janjawid yagabye igitero ku baturage batari mu bwoko bw’Abarabu mu misozi ya Jebel Moon, hafi y’umupaka n’igihugu cya Cadi
Batwitse imidugudu ine yose bayigira umuyonga. Bemeza ko bakoresheje n’imbunda ziremereye nka za mitarayeze. Bishe abaturage 17, bakomeretsa abandi 46. Abandi benshi nabo bazimiye cyangwa bahunze.
Iyi mirwano ikurikiye indi yabaye ku itariki ya 6 y’uku kwezi i Jebel Moon. Yose hamwe imaze guhitana abaturage barenga 40. Naho ishyirahamwe ry’abaganga bo muri Darfur rivuga ko imirwano hagati y’aborozi b’Abarabu n’Abihinzi b’Abirabura, bapfa amazi n’ubutaka bw’inzuri, yahitanye abantu bagera kuri 250 kuva mu kwezi kwa cumi kugera mu kwa 12 mu mwaka ushize muri Darfur.
VOA/AP/AFP
Facebook Forum