Ubufaransa bwasavye uno musi ku wa mbere Prezida w'Uburusiya, Vladimir Putin gufata ingingo ku nama na Prezida wa Reta zunze ubumwe za Amerika, Joe Biden, igenewe kugabanya imishamirano ku bijanye na Ukraine.
Umutegetsi mu biro vya prezida w’Ubufransa atashatse ko izina ryiwe rimenyekana yabwiye abamenyeshamakuru ko guhuza Poutin na Biden ari ibintu bishoboka, kandi biva kuri Putine.
Ivyatangajwe n’uwo mutegetsi bibaye amasaha 24 inyuma y’uko Prezida w’Ubufransa, Emmanuel Macron, avuganye incuro zibiri kw’itelefone na Prezida Putin na Prezida Biden mu kigoro ko gutunganya inama hagati y’abo bategetsi babiri.
Yatangaje ko bariko bagira akigoro ko kugabanya uruhagarara muri Ukraine. Uwo mutegetsi avuga ko Prezida Macron ariko akora ibishoboka vyose kugira Putin na Biden bahure.
Ibiro vya prezida w’Ubufransa vyasohoye itangazo mu masaha ya kare uno musi ku wa mbere ryerekana ko abo bategetsi bompi bemeye muri rusangi guhura.
Abategetsi bo mu biro vya Prezida Biden batangaje ko inama nk’iyo ishobora kuba hamwe Uburusiya butotera Ukraine. Abategetsi b’Uburusiya bamenyesha ko hakiri kare kuvuga ku vyerekeye iyo nama, ko ata migambi iboneka ihari ku bijanye nayo. (AFP)
Facebook Forum