Umuyobozi w’umutwe w’inyeshyamba zirwanira kwikura ku gihugu cya Ukraine mu burasirazuba bw’igihugu yatangaje ko batangiye guhungisha abaturage bo muri ako gace babajyana mu Burusiya.
Byavuzwe na Denis Pushilin uyobora umutwe wa DPR uharanira ubwigenge bw’agace ka Donetsk kari mu burasirazuba bwa Ukraine hafi n’umupaka w’Uburusiya.
Uwo muyobozi yavuze ko babikoze mu rwego rwo kuramira abaturage mu gihe intambara y’aba itangiye hagati y’Uburusiya na Ukraine. Mu butumwa bwa videwo, yavuze ko guhera kuri uyu wa gatanu batangiye kohereza abaturage babo mu Burusiya.
Ashinja Ukraine kuba yitegura kugaba ibitero mu duce dufitanye umubano mwiza n’ubutegetsi bwa Moscow.
Pushilin avuga ko icyo gikorwa cyahereye ku bagore, abana n’abandi bari mu z’abukuru. Avuga ko Uburusiya n’akarere ka Rostov bahana imbibe bemeye kwakira abo baturage bahungishwa.
Ibi abivuze mu gihe ibihugu byo mu burengerazuba bw’isi bikomeje kuvuga ko Uburusiya buri mu myiteguro ya nyuma yo kugaba ibitero kuri Ukraine.
© Agence France-Presse
Facebook Forum