Gukuraho ayo mategeko ni ikimenyetso cy’uko ubushyamirane bwamenekeyemo amaraso hagati ya guverinema n’ingabo zirwanya ubutegetsi z’intara ya Tigreya, bwaba burimo kworoha.
Icyemezo cy’inteko ishinga amategeko cyo gukuraho amategeko yo mu bihe bidasanzwe igihugu cyagenderagaho, gifashwe nyuma y’ibyumweru bitatu, inama y’abaminisitiri ibyemeje. Mu badapite 312 batoye, 63 banze kubishyigikira, naho 21 bifashe.
Amategeko y’ibihe bidasanzwe yahaye guverinema ububasha bwo gufunga abaturage bataburanye no gusaka ingo nta ruhushya rw’inkiko. Abasivili bo mu bwoko Tigrinya ibihumbi, barundanyirijwe hamwe kandi bashyirwa muri za gereza no mu mazu yagenewe kubikwamo ibintu.
Etiyopiya yashyizeho itegeko ry’ibihe bidasanzwe, mu kwezi kwa 11 nyuma y’uko ingabo za Tigreya ziteye utundi turere tubiri, ari na ko zakangishaga guhungabanya umurwa mukuru.
Cyakora guverinema mu kwihimura mu kwezi kwa 12 yasubije inyuma izo ngabo za Tigreya n’ubwo imirwano yakomeje mu ntara za Afar na Tigreya. Aha miliyoni z’abantu bari babeshejweho n’infashanyo y’ibiribwa. Bafungiwe amayira, nta biribwa bihagera kuva hagati mu kwezi kwa 12.
Abadipolomate b’abanyamahanga bafashije nk’abahuza hagati y’impande zombi ubu bafite icyizere cy’uko hari ibirimo kugerwaho biganisha ku mahoro.
Facebook Forum