Abatalibani kuri uyu wa gatatu bafashe ibibuga vy’indege vyo mu ntara za Farah na Kunduz muri Afuganistani. Amakuru atangwa n’ibimenyeshamakuru avuga ko bafashe kandi n’ikambi ya gisirikare y’i Kunduz, inyuma y’aho abasirikare amajana bishikanye kuri bo.
Umushingamateka wa Afuganistani, Shah Khan Sherzad yavuze ko ikibuga c’indege n’ikambi vyo mu ntara ya Kunduz vyafashwe hamwe n’ibikoresho vyose vyarimwo.
Abatalibani bavuga ko ubu bagenzura imirwa mukuru y’intara icenda kandi bariko begereza gufata iyindi.
Uku gutera intambwe kw’Abatalibani kubaye ku musi Perezida Ashraf Ghani yari agiye i Mazar-i-Sharif kuremesha abasirikare ba reta n’imigwi ibashigikiye kurwanira ico gisagara kinini kiri mu buraruko bwa Afuganistani. Ni igisagara gikomeye mu budandaji kandi kiri ku rubibe n’ibihugu bibanyi.
Facebook Forum