Abaturage Basubiye Mu Mihanda Muri Sudani

Muri Sudani, abantu ibihumbi n'ibihumbi baraye bakoze imyigarambyo mu murwa mukuru Khartoum, no mu yindi mijyi itandukanye nka Omdurman, kugera no muri Darfur mu burengerezuba bw'igihugu, batitaye ku mabwiriza ya guma mu rugo kubera icyorezo cya virusi ya Corona.
Bafite amabendera y'igihugu, baririmbaga cyane cyane ngo "ukwishyira kwizana, amahoro, ubutabera" nko muri revolisiyo ya rubanda yahiritse Perezida Omar al-Bashir mu mwaka ushize. Muri make, barasaba ko igihugu kiyoborwa n'abasivili kurusha uko bimeze muri iki gihe.
Abasilikali, ku isonga hari General Abdel Fattah Abdelrahmane al-Burhan nk'umukuru w'igihugu, basangiye ubutegetsi bw'inzibacyuho n'abasivili, barimo minisitiri w'intebe Abdallah Hamdok. Ariko abaturage basanga abasilikali badashaka kwihutira gushyiraho izindi nzego za gisivili, nk'inteko ishinga amategeko na ba guverineri ba leta zigize Sudani.