Umuryango w'Ubumwe bw'Uburayi uritegura gutangaza ifungurwa ry'imipaka ku bihugu 15 kuri uyu wa gatatu mu rwego rwo kudohora ku ngamba zo gukumira virusi ya Corona. Ni urutonde rw’uburayi rusa n’urwatunguye benshi?
Mu bihugu biza kw’isonga harimo Ubushinwa ku mugabane w’Aziya n'u Rwanda n’u Rwanda ku mugabane w’Afurika. Ariko Leta zunze ubumwe z'Amerika ntabwo iri kuri rutonde kubera imibare y'abandura virusi ya Corona n'abahitanwa na yo ikomeje kuzamuka. Uburayi bwari bwarafunze imipaka mu kwezi kwa gatatu uyu mwaka mu rwego rwo kwirinda ikwirakwira ry'ikiza cya Virusi ya Corona.
Abategetsi b'Umuryango w'Ubumwe bw'Uburayi baravuga ko imwe mu ngingo yagendeweho mu kugena ibihugu bizakomorerwa ari uko urugero rw'abandura virusi ya Corona muri ibyo bihugu rugomba kuba rungana cyangwa ruri hasi y'urwo mu bihugu by'Ubumwe bw'Uburayi. N’ubwo iki cyemezo kiri bufatwe ku rwego rw'umuryango w'Ubumwe bw'Uburayi, buri gihugu muri 27 biwugize kigomba gukurikiza amabwiriza yacyo n'ingamba zacyo zo kwirinda ku birebana n'abagomba kwinjira. Uyu mwanzuro kandi uzajya usuzumwa buri byumweru bibiri ufatwaho icyemezo.
Urutonde rw'ibihugu bikomororerwa kwinjira mu Burayi rugomba kuba rwemejwe kuri iki gicamunsi. Kugeza ubu, ibihugu biteganywa gukomorerwa uhereye ku munsi w'ejo harimo Ubushinwa, ari naho ikiza cya Covid 19 cyatangiriye, Alijeriya, Ostraliya, Canada, Georgia, Japan, Montenegro, Maroko, Nouvelle Zelande, u Rwanda, Serbiya, Koreya y'Epfo, Tayilande, Tuniziya na Uruguay. Uru rutonde ruremezwa ari uko nibura ibihugu 15 muri 27 bigize umuryango w'ubumwe bw'uburayi bitoye “YEGO”.
Leta zunze ubumwe z'Amerika ntabwo yagaragaye kuri uru rutonde kubera ubwandu bwa virusi ya Corona bukomeje kwiyongera mu gihugu n'umubare w'abahitanwa n'iyi ndwara uri hejuru kuruta ahandi ku isi.
Abayobozi b'Umuryango w'Ubumwe bw'Uburayi bihutiye gusobanura ko iki cyemezo kidashingiye ku mpamvu za politike ahubwo gishingiye ku bushakashatsi no ku gushaka kurinda abaturage b'Uburayi. Ariko ntawe uzi uko Perezida Donald Trump w'Amerika ari buze kucyakira. We amaze iminsi anenga ku buryo butaziguye bimwe mu byemezo by'umuryango w'Ubumwe bw'Uburayi. Birashoboka rero ko yakibona nk'igishingiye ku mpamvu za politike
Facebook Forum