Umushinjacyaha Wa Irani Arashakisha Perezida Trump

Irani yasohoye impapuro zo guta muri yombi perezida wa Leta zunze ubumwe z'Amerika, Donald Trump, "yaba akiri ku butegetsi cyangwa yarabuvuyeho," n'abandi bantu 35 bagize uruhare mu iyicwa rya General Qassem Soleimani wa Irani. Uyu yarashwe n'indege itagira umuderevu "drone" mu kwezi kwa mbere 2020 ari mu rugendo i Bagdad, umurwa mukuru wa Iraki.
Nk'uko umushinjacyaha mukuru wa Teherani, Ali Alqassi-Mehr, abitangaza, bariya bantu 35 barimo "abanyapolitiki n'abasilikali bo muri Leta zunze ubumwe z'Amerika no mu bindi bihugu." Ariko ntasobanura ibyo ari byo. Avuga ko akurikiranye bose ku "byaha y'ubuhotozi n'iterabwoba."
Irani yasabye inkunga ya polisi mpuzamahanga Interpol. Ariko iyi, mu itangazo yashyize ahagaragara, ivuga ko "ikurikije ingingo ya 3 y'itegeko shingiro ryayo idashobora kwivanga mu bibazo bya politiki, igisilikali, amadini, n'amoko."
Intumwa yihariye ya Leta zunze ubumwe z'Amerika ku bibazo bya Irani, Brian Hook, avuga ko "ibyo Irani yatangaje nta gaciro bifite."