Inama Ya G5-Sahel I Nouakchott

Kuri uyu wa kabiri, umukuru g'ibihugu cy'Ubufaransa, Emmanuel Macrn, na bagenzi be bagize G5-Sahel, ari bo Mahamadou Issoufou wa Niger, Idriss Déby wa Tchad, Mohamed Ould Ghazouani wa Mauritaniya, Roch Marc Christian Kaboré wa Burkina Faso, na Ibrahim Boubacar Keïta wa Mali, barahurira mu nama i Nouakchott, umurwa mukuru wa Mauritaniya.
Bararebera hamwe aho urugamba rwo kurwanya imitwe y'intagondwa rugeze mu karere ka Sahel, nyuma y'amezi atandatu bamaze bemeje kongera ingufu. Muri uru rwego, Ubufaransa bwohereje abasilikali b'inyongera. Ubu bose hamwe bararenga ibihumbi bitanu.
Muri iyi nama haraba harimo kandi perezida w'inama nshingwabikorwa y'Umuryango w'Afrika yunze ubumwe, Moussa Faki Mahamat, n'umunyamabanga mukuru w'Umuryango w'ibihugu bihuriye ku rurimi rw'Igifaransa Francopfonie, Louise Mushikiwabo.
Nk'uko perezidanse y'Ubufaransa, Élysée, ibitangaza, nyuma y'inama yabo aba bayobozi baragirana indi, noneho ku buhanga bwa "videoconference," n'abandi bakuru b'ibihugu batanga umusanzu mu ntambara yo muri Sahel. Barimo perezida w'inama y'abakuru b'ibihugu by'Ubulayi bwunze ubumwe Charles Michel, na ba minisitiri b'intebe b'Ubudage Angela Merkel, n'Ubutaliyani Giuseppe Conte.
Naho ibiro bya minisitiri w'intebe wa Espagne, Pedro Sanchez, bivuga ko nawe aza kuba ari mu nama y'i Nouakchott, hamwe n'umunyamabanga mukuru w'Umuryango w'Abibumbye, Antonio Guterres.