Uyu munsi, Abarusiya batangiye itora rya kamarampaka, referendumu, ku ivugurura ry'itegeko nshinga rishobora gutuma Perezida Vladimir Putin aguma ku butegetsi kugera mu 2036.
Abaturage miliyoni 110 bashobora gutora bagomba kwemeza ivugurura ry'itegeko nshinga ku ngingo 206 zinyuranye. Zireba imisaranganyirize y'ubutegetsi, ubwiteganyirize bw'abakozi, cyangwa ubudahangarwa ku bahoze ari abakuru b'igihugu. Ryimakaza imana mu buzima bwa rubanda. Rivuga ko gushyingiranwa ari hagati y'umugabo n'umugore gusa. Ariko ingingo abantu bibandaho cyane ni irebana na manda z'umukuru w'igihugu.
Vladimir Putin amaze imyaka 20 ku butegetsi. Manda ye y'ubu igomba kurangira mu 2024. Ariko ivugurura ry'itegeko nshinga rimwemerera, aramutse abishatse, kongera kwiyamamaza izindi manda ebyiri z'imyaka itandatu imwe-imwe. Aramutse abikoze koko, yazava ku butegetsi mu 2036, afite imyaka 84 y'amavuko. Azuzuza 68 mu kwezi kwa cumi gutaha.
Ku cyumweru gishize, Vladimir Putin yaravuze, ati: "Abaturage nibemeza itegeko nshinga rishya, ndumva nta kizaba kimbuza kongera kwiyamamaza. Ariko sindafata icyemezo." Yongeyeho, ati: "Gusa abantu bakwiye kwiyumvisha ko guhora batekereza cyangwa bashakisha umuntu wazansimbura byakwangiriza igihugu."
Kuri Alexeï Navalny, uwa mbere mu batavuga rumwe n'ubutegetsi, "iyi ni coup d'Etat. Vladimir Putin "arashaka kwigumira ku butegetsi ubuzima bwe bwose."
Naho ubutegetsi, nta mpungenge bufite. Bwizeye neza ko abaturage bazemeza itegeko nshinga rishya. Ahubwo ndetse ryarangije kwandikwa mu bitabo. Ryageze no mu nzu zibigurisha. Ryabanje kwemezwa n'inteko ishinga amategeko n'urukiko rurinda iremezo ry'itegeko nshinga. Nyuma Perezida Putin yarishyizeho umukono. Referendumu rero ntiyari ikenewe, ariko Vladimir Putin we ubwe ni we wiyishakiye.
Ubundi italiki nyamukuru y'iyi referendumu ni iya mbere y'ukwa kalindwi kugiye kuza. Ariko igiye kumara icyumweru cyose kugirango birinde abantu benshi icyarimwe mu biro by'amatora kubera icyorezo cya virusi ya Corona. Abantu barenga ibihumbi 600 barayanduye mu Burusiya. Abandi ibihumbi umunani 600 yarabishe kugeza ubu.
Facebook Forum