U Rwanda Rwategetse ko Amashuri n'Insengero Bifungwa Kubera Virusi ya Corona

Leta y'u Rwanda yategetse ko insengero, amashuri na za kaminuza bifunga mu rwego rwo kugabanya ikwirakwizwa ry'icyoreza cya virusi ya corona.

Ni nyuma yuko muri icyo gihugu hagaragaye umuntu wa mbere wanduye iyo virusi. Ni Umuhinde winjiye mu gihugu avuye mu Buhinde ku itariki 8 y'uku kwezi.

Itangazo ryasohowe na ministeri y'ubuzima rivuga ko ayo mabwiriza ahita ashyirwa mu bikorwa akazamara nibura igihe cy'ibyumweru bibiri.

Andi mabwiriza agaragara muri iryo tangazo avuga ko abakozi babyumvikanyeho n'abakoresha babo, bakorera mu rugo aho bishoboka.

Ikindi nuko ingendo zitari ngombwa zigomba kugabanywa mu rwego rwo kwirinda ubucucike mu modoka zitwara abagenzi.

Ibikorwa by'ubucuruzi na za resitora bizakomeza gukora.