Xi Jinping Yatangaje Intambara Kuri Virusi ya Corona

Perezida Xi Jinping w’Ubushinwa yatangaje icyo yise “Intambara ya Rubanda” ku cyorezo cya virusi ya Corona gikomeje guhitana abantu.

Ibiro ntaramakuru bya Leta mu Bushinwa byatangaje ko Perezida Xi Jinping yavuze ko igihugu cyose cyahagurukanye ingufu mu gufata ingamba zihamye kandi zihuse mu intambara yo kuvura no kwirinda ikwirakwizwa ry’icyo cyorezo.

Kuri uyu wa Gatanu, abakozi ba Leta y’Ubushinwa mu ntara ya Hubei aho icyo cyorezo cyagaragaye bwa mbere batangaje ko abandi bantu 69 bahitanywe na cyo.

Bivuze ko umubare w'abamaze guhitanwa n'iyo virusi mu Bushinwa urenga 630. Batangaje kandi ko abandi bantu 2,500 banduye, bivuga ko umubare rusange w’abamaze kwandura muri icyo gihugu urenga 30,000.

Hanze y’Ubushinwa harabarurwa abantu 150 bagaragaweho n’iyo ndwara mu bihugu 23. Umwe muri bo yaguye mu gihugu cya Filipine ari na we wa mbere uguye hanze y’Ubushinwa azize iyo ndwara.

Umuganga w’Umushinwa wayanduye ari na we wabaye uwambere guteza ubwega ko iki cyorezo cyadutse yaguye mu mugi wa Wuhan. Li Wenliang yari afite imyaka 34. Polisi yo mu Bushinwa yari yabanje kumutwama imurega gukwirakwiza ibihuha kuri internet no guhungabanya umudendezo wa rubanda.