Sentare Izocira Imanza Abasirikare muri Sudani y'Ubumanuko

Reta ya Sudani yashinze sentare idasanzwe izocira imanza abajejwe umutekano bagirizwa gukora ivyaha bitandukanye.

Umukuru w’iyo sentare yashikirije kuri uyu wa kane ko iyo sentare ari akaryo ko kurangiza ingendo yo kudahana no kugarukana ishusho nziza muri ico gisata, cagirizwa guhungabanya agateka ka muntu.

Haraciye imyaka itanu Perezida Salva Kiir yemeje itegeko ryateye imyidogo mu gihugu, riha uburenganzira abajejwe umutekano guhagarika, gufunga no gutohoza ku banyagihugu canke kwigarurira ubutunzi bwabo mu gihe bushobora kubera intambamyi umutekano w’igihugu.