Muri Irani, bwa mbere na mbere mu myaka 40 ishize, abagore bemerewe kureba umukino w’umupira w’amaguru w’abagabo. Abagore 3500 baguze tike zo gukurikira umukino w’ikipe y’igihugu cya Irani n’iy’igihugu cya Cambodge uzaba ejo kuwa kane i Teherani mu rwego rw’amajonjora y’igikombe cy’isi 2022.
Nyuma ya revolisiyo ya Kisilamu mu 1979 muri Irani, abagore ntibari bemerewe kujya muri za sitade. Leta ya Irani yongeye kubemerera nyuma y’urupfu rw’umugore witwa Sahar Khodayari w’imyaka 30. Mu kwezi kwa cyenda gushize, yiyambitse gihungu, agerageza kwinjira muri sitade kugira ngo ajye kwirebera umukino w’ikipe yakundaga. Polisi yamutaye muri yombi. Yiyahuye yitwitse n’umuriro imbere y’urukiko yari agiye kuburaniramo.
Nyuma y’urupfu rwa Sahar Khodayari, FIFA yashyize igitutu kuri Irani iyisaba kureka abagore nabo kujya kuri sitade. Naho bamwe mu bakinnyi b’umupira b’ibyamamare ku isi n’abaharanira uburenganzira bwa muntu bandikiye FIFA bayisaba kwirukana Irani mu marushanwa mpuzamahanga.
Muri sitade ejo, abagore ntibazicara iruhande rw’abagabo. Bazajya mu gice cyabo cyihariye. Abapolisikazi 150 bazaba kandi babacungira hafi.
Facebook Forum