Polisi ya Malawi Ihanganye n'abatavuga Rumwe na Perezida Watowe

Abatavuga rumwe n’ubutegetsi muri Malawi barakajwe n’uko Perezida Peter Muthalika yongeye gutorwa uyu munsi bahanganye na polisi. Yakoresheje ibyuka biruyana mu maso kubatatanya. Perezida Muthalika yavugiye kuri televiziyo y’igihugu asaba polisi n’igisirikare guhagarika imyigaragambyo ikomeje.

Uyu munsi abigaragambya bagiye ku biro leta ikoreraho bashinja ishyaka rya Democratic Progressive Party riri ku butegetsi kwiba amajwi ribifashijwemo n’akanama gashinzwe amatora bemeza ko kashyizweho na Perezida Peter Muthalika ubwe.

Ako kanama katangaje ko Peter Muthalika ariwe utsinze amatora kuri 39% mu gihe ishyaka ritavuge rumwe n’ubutegetsi rya Malawi Congress Party riyobowe na Lazarus Chakwera ryabonye 35%.

Abayobozi babiri b’abatavuga rumwe n’ubutegetsi muri iki cyumweru batanze ikirego mu rukiko basaba iseswa ry’ibyatangajwe. Baravuga ko habayeho kwiba amajwi. Gusa Urukiko Rurinda Ubusugire bw’Itegeko Nshinga muri Malawi nti ruratangaza italiki ruzumviraho urwo rubanza.