Isirayeri yabwiye sentare mpuzamakungu mpanavyaha ko izokwunguruza ku mitahe yasohoye yo guhagarika umushikiranganji wa mbere, Benjamin Ntanyahu, na Yoav Gallant yahoze ari umushikiranganji ajejwe kwivuna abansi.
Ibiro vy’umushikiranganji wa mbere wa Isirayeri, Benjamin Natanyahu, vyavuze ko vyasabye iyo sentare kuba irabangiye ku vyerekeye gushira mu ngiro imitahe yasohoye.
Umushikiranganji wa mbere wa Isirayeri, Benjamin Natanyahu, yatangaje ko Lidsey Graham, umusenateri w’umurepublikani wo muri Amerika, yamuciriye ku mayange ku ngingo zitari nke ariko ashikiriza muri Kongre ya Amerika, zofatirwa sentare mpuzamakungu mpanavyaha y’i La Haye n’ibindi bihugu vyokorana na yo.
Sentare mpuzamakungu mpanavyaha, ku musi wa kane w’indwi irangiye, ni ho yasohora imitahe yo guhagarika Benjamin Netanyahu na Yoav Gallant, yahoze ari umushikiranganji ajejwe kwivuna abansi, hamwe n’umutegetsi w’umurwi Hamas, Ibrahim Al-Masri. Uyu azwi kandi kw’izina rya Mohameed Deif. Iyo sentare yabagirije ko bakoze ivyaha vyo mu ntambara n’ivyaha vy’agahomerabunwa mu ngwano iriko iba mu ntara ya Gaza. (REUTERS)