Muri Nijeriya ubushinjacyaha bwareze abantu 76 barimo abana 30 bubashinja icyaha cy’ubugambanyi no gushishikariza igisirikare guhirika ubutegetsi.
Ni nyuma y’uko bagize uruhare mu myigaragambyo ikomeye yabaye mu kwezi kwa munani yamagana izamba ry’ubukungu muri icyo gihugu.
Icyo gihe, abantu bigaragambirije mu mijyi ya Abuja, Lagos n’iyindi itandukanye mu gihugu, bagamije kwerekena ko batishimiye amavugurura mu rwego rw’ubukungu yatumye ifaranga ryo muri icyo gihugu rita agaciro, ubukene bukarushaho kwibasira abanyanijeriya.
Perezida Bola Tinubu yavuze ko abo baregwa bagomba gukurikiranwa mu rukiko kugirango umutekano mu gihugu udahungabana.
Umuryango uharanira uburenganzira bwa muntu, Amnesty International, wavuze ko abantu bagera kuri 13 baguye muri iyo myigaragambyo.
Undi muryango uharanira uburenganzira bwa muntu wavuze ko abatarakwiza imyaka y’ubukure na bo batawe muri yombi bafatiwe muri iyo myigaragambyo, bakaba bari bafunzwe na polisi ya Nijeriya kuva mu kwezi kwa munani.