Urukiko rwisumbuye rwa Gasabo mu mujyi wa Kigali rumaze kwanzura ko ikirego cyatanzwe n’abashumba batandatu bifuzaga ko Apotre Paul Gitwaza yatanguje itorero, Zion Temple, yirukanwa ku buyobozi bwaryo.
Ni umwanzuro uje utesha agaciro ibyasabwe n’abo bashumba bari mu bavuga ko "bari mu bashinze iryo torero" basabaga urukiko rwisumbuye rwa Gasabo kwemeza ko Paul Gitwaza atakiri umuvugizi waryo kuko bemeza ko bamwirukanye.
Icyemezo cy’urukiko cyasomwe abaregwa n’abarega nta n'umwe uri mu rukiko. Ni nako kandi byari bimeze ubwo bitabaga urukiko bwa mbere mu ntangiriro z’uku kwezi kwa 11: Nabwo yaba abaregwa ndetse n’abarega nta n'umwe wagaragaye ku rukiko, usibye abunganizi babo.
Urukiko rwafashe umwanzuro ku nzitizi yari yazamuwe n’abahagarariye abaregwa ari bo Apoter Paul Gitwaza n’Ikigo cya leta gishinzwe imiyoborere, RGB.
Abunganira abaregwa bavuze ko abashumba batandatu bari inyuma y’icyo kirego batabifitiye ububasha kuko umuryango ushingiye ku myemerere ya Zion Temple uyoborwa na Apotrer Paul Gitwaza, kandi akaba atari we watanze ikirego.
Abo, bavuga ko abashumba bareze bari bakwiye kubikora mu izina ryabo, kuko batayoboye umuryango kandi bakaba batari babiherewe uburenganzira na Apotre Gitwaza.
Abunganira Apotre Gitwaza bumvikanishije ko ari we muyobozi wemewe.
Bavuze kandi ko abatanze ikirego batabanje gutakamba, ari byo kwiyambaza urwego ruri hejuru y’urwego rw’igihugu rw’imiyoborere, RGB, nk’uko amategeko abiteganya: Izi nzitizi ni zo umucamanza yaciriyeho urubanza kuri uyu wa gatanu, maze urukiko rufata umwanzuro uvuga ko ikirego cyatanzwe n’abapastoli 6 kitakiriwe.
Umwe mu bavoka bahagarariye abareze, ntiyifuze gutangaza amajwi ye, yabwiye Ijwi ry’Amerika, ko batarasobanukirwa neza umwanzuro w’urukiko, kuko ko usibye kwandika gusa ko ikirego cyitakiriwe, bataramenya niba inzitizi zose zatanzwe n’uruhande rw’abaregwa ari bo Apotre Gitwaza Paul na RGB zose zemewe n’urukiko.
Uyu munyamategeko kandi yasobanuye ko hari inzitizi zatanzwe zitari koroha gushyirwa mu bikorwa. Muri zo, harimwo nkaho ko abunganira Paul Gitwaza bavugaga ko mbere y’uko aba bapasteri barega, bagombaga kubanza gutakambira inzego mbere y’uko bajya mu nkiko.
Uyu munyamategeko yavuze ko ibi bitari gushoboka kuko batari gutakambira RGB isanzwe ifite mu nshingano kugenzura amatorero, kuko ari yo "yabangamiye umwanzuro wo kwirukana Apotre Paul Gitwaza", bityo nayo ikaba iregwa.
Umunyamategeko wunganira abarega yasobanuye ko kugeza ubu barindiriye kubanza kubona Kopi y’urubanza, bakamenya niba bazajurira cyangwa se bazatanga ikindi kirego.
Ijwi ry'Amerika riracarondera ico uruhande rwa Apotre Paul Gitwaza ruvuga kuri iki kibazo. Naho ataco aratangaza kuri microz'Ijwi ry'Amerika, mu biterane arimo ku mugabane w'Uburayi n'Amerika, Apotre Gitwaza yavuze ko" Abakirisu badakwiriye kurangazwa n'ibyo bari kumva, ukuri kuzatsinda."
Intandaro yatumye abashumba 6 bo mu Itorero, Zion Temple, bagana inkiko, itangirira mu kwezi kwa kabiri umwaka ushize, ubwo bishyize hamwe bandikira Apotrer Paul Gitwaza watanguje iryo torero, bamumenyesha ko akuwe ku mwanya wo kuriyobora.
Mu mpamvu zatanzwe, abo bashumba bagaragaza ko Apotre Paul Gitwaza "afata imyanzuro ku giti cye". Ikifuzo cyo kwirukana Apotre Gitwaza ariko nticyashyizwe mu ngiro nkuko byifuzwaga, kuko urwego rw’igihugu rw’imiyoborere, RGB, rwavuze ko ibyakozwe binyuranyije n’amategeko.
RGB ivugaga ko abirukanye Apotre Gitwaza batabifitiye ububasha kuko umuyobozi w’itorero akurwaho n’inteko rusange.
Kanda musi wumve ibindi mu inkuru y'Umunyamakuru Assumpta Kaboyi uri i Kigali mu Rwanda.
Your browser doesn’t support HTML5
Apotre Gitwaza Asaba Abakirisu Kutarangara