Aba banyeshuri bashimuswe mu ijoro ryo kuwa kane bucya ari kuwa gatanu mu cyumweru gishize, mu ishuri ryisumbuye ry'ahitwa Jangebe, muri leta ya Zamfara, mu burengerazuba bw'amajyaruguru y'igihugu. Icyo gihe, leta yatangaje ko bari 317. Ariko uyu munsi, guverineri wa Zamfara, Bello Matawalle, yatangaje ko abana bose bari barashimuswe uko ari 279 barekuwe. Ntiyasobanuye icyo kinyuranyo cy'imibare.
Ibyo ari byose, aba banyeshuri bageze ku ngoro y'aho guverineri Matawalle akorera, i Gusau, umurwa mukuru wa Zamfara, bari mu mabisi. Bakihagera bahawe imyenda imeshe yo guhinduranya n'iyo bari bambaye. Abaganga nabo babapimye, bavuga ko bose bameze neza, nta burwayi bafite. Ariko na none, ubutegetsi ntibusobanura niba barekuwe butanze ingurane.
Ishimutwa ry'aba bakobwa b'i Jangebe ni irya kane ry'ikivunge ryibasiye abanyeshuri bo mu mashuri yisumbuye muri aya mezi atatu ashize mu burengerazuba bw'amajyaruguru ya Nijeriya. Buri gihe, abo leta yita imitwe y'amabandi abatwara abarekura yabanje gusaba ingurane y'imari itububutse. Ariko nta na rimwe leta yari yemera ko koko iyitanga.
Mu itangazo yashyize ahagaragara, perezida wa Nijeriya, Muhammadu Buhari, yishimiye irekurwa ry'abanyeshurikazi b'i Jangebe. Avuga ko guverinoma ye itazatezuka guhiga abitwaje intwaro bose ku buryo butemewe n'amategeko
Facebook Forum