Ishami rya ONU ryita ku buzima OMS ryatanze impuruza kuri uyu wa kabiri ku bijyanye n’uburyo indwara y’iseru ikwirakwira vuba na vuba, aho abantu barenga 306.000 barwaye iyo kw’isi hose mu mwaka ushize, bigaragaza ubwiyongere bwa 79 kw’ijana hagereranyijwe no mu mwaka wa 2022.
Umujyanama wa OMS, ku bijyanye n’indwara z’iseru na rubewole, Natasha Crowcroft, yagize ati: “Dufite impungenge cyane z’indwara y’iseru”. Yashimangiye cyakora ko imibare y’abarwayi b’iseru idatangazwa cyane kandi ko imibare nyayo ishobora kuba iri hejuru cyane.
Kugirango haboneke imibare nyayo, ishami rya ONU ryita ku buzima rishingira ku mibare ya buri mwaka n’ikigereranyo giheruka cyerekena ko hari miliyoni 9.2 barwaye n’i 136.216 bapfuye mu 2022.
Iyo mpuguke ya OMS ivuga ko uburyo nk’ubwo bwo gushaka imibare nyayo butari bwakorwa kuri uyu mwaka ushize. Gusa, yerekanye ko muwa 2022, hari habonetse ubwiyongere bw’imfu bwa 43 kw’ijana hagereranyijwe no mu mwaka wabanje.
Avuga ko bahereye kuri uku gutumbagira kw’umubare w’abarwayi, biteze ko n’umubare w’abahitanywe n’iyo ndwara uzaba nawo wariyongereye muri 2023, kandi ko 2024 uzaba ikigeragezo gikomeye. Ibyo yabivugiye mu kiganiro yagiranye n’abanyamakuru kuri videwo, ari i Kayiro mu Misiri.
Iyi mpuguke yanaburiye ko ibihugu birenga icya kabiri kw’isi, ubu bitekerezwa ko bizaba bifite ibyago byo ku rwego rwo hejuru byo kubamo ibyorezo by’iseru bitarenze impera z’umwaka. Ikindi yavuze ko abana bagera muri miliyoni 142, ku kigereranyo, bikekwa ko bashobora kuzarwara iyo ndwara. Yasobanuye ko impamvu y’ubwiyongere bw’iyo ndwara ituruka kw’igabanuka ry’ibikorwa by’ikingira.
Umujyanama wa OMS ku bijyanye n’ikingira ry’indwara y’iseru na rubewole, Natasha Crowcroft, avuga ko byibura 95 by’abana bakenewe gukingirwa iseru mu buryo bwuzuye, hagamijwe kubarinda ibyorezo, ariko ko muri rusange inkingo zagabanutse kuri 83 kw’ijana. Yibukije kandi ko 92 kw’ijana by’abana bose bapfa bazize Iseru, indwara iterwa na virusi, yandura kandi ikunze kurwarwa n’abana, ari baba mu bihugu bifite umutungo uri hasi cyane. (AFP-VOA News)
Forum