Muri Tuniziya, ubutegetsi bwataye muri yombi Abdel Karim Harouni umuyobozi mukuru w’ishyaka rya Kiyisilamu, Ennahda ritavuga rumwe n’ubutegetsi. Ibyo byatangajwe n’iryo shyaka ku wa gatandatu.
Haruni akuriye inama nkuru y'ishyaka Ennahda, yitwa Shura. Iri shyaka ni ryo ryari rifite abadepite benshi mu nteko ishinga amategeko yakuweho na Perezida Kais Saied mu waka wa 2021.
Ihuriryo ry’amashyaka Salvation Front, ryatangaje ko iki cyemezo ryise ko 'kidakurikije amategeko' cyafatiwe Harouni, kiri mu rwego rwo guta muri yombi abayoboke b’ishyaka Ennahda no gufunga ibiro byaryo bikuru.
Muri uyu mwaka, polisi yataye muri yombi Rached Ghannouchi, wari ku isonga mu banenga ubutegetsi bwa perezida Kais Saied. Rached Ghannouchi yafatanywe n’abandi barwanashyaka ba Ennahda barimo Noureddine Bhiri, Riadh Bettaib, Said Ferjani, Sahbi Atigue na Mohamed Ben Salem.
Guverinoma yahagaritse inama zose ku biro by’ishyaka Ennahda, polisi ihita ifunga ibiro by’iryo shyaka byose mu gikorwa ryavuze ko kigamije gushimangira ubutegetsi bw’igitugu.
Muri uyu mwaka kandi polisi yataye muri yombi abanyapolitike bakuru bashinjaga Perezida Kais Saied gukora kudeta nyuma yo gukuraho inteko ishinga amategeko yatowe n’abaturage mu mwaka wa 2021 agashyiraho ubutegetsi bushingiye ku itegeko rya perezida mbere y’uko avugurura itegeko nshinga.
Saied yavuze ko abo batawe muri yombi ari “abagambanyi bakora iterabwoba”. Abakuriye amashyaka atavuga rumwe n’ubutegetsi bavuze ko bafungiye impamvu za politike. Imashyirahamwe aharanira uburenganzira bwa muntu muri Tuniziya n’ayo ku rwego mpuzamahanga akomeje gusaba ko aba banyapolitike barekurwa. (Reuters)
Forum