Umuyobozi w'umurwi Hezbollah muri Libani, Hassan Nasrallah, kuri uyu wa gatatu, yatangaje ko ata kibanza na kimwe kizorangwamwo umutekano muri Israyeri hamwe ingwano yokwaduka hagati y'ico gihugu n'umurwi ayoboye.
Nasrallah, mw’ijambo yashikirije, kuri uyu wa gatatu, kuri televiziyo, yavuze ko umurwi Hezbollah ufise urutonde rw’ibibanza wokoramwo ibitero muri Israyeri.
Nasrallah yavuze ko ata kibanza na kimwe co muri Israyeri kizoba cikingiye ibitero vya misile na drone vy’umurwi Hezbollah. Ku musi wa kabiri w’iyi ndwi, umurwi Hezbollah warashize ahabona ivyo watangaje ko ari amasanamu y’ibibanza bitari bike bikomeye vyo muri Israyeri yafashwe n’utudege tutagira umudereva bita drone.
Umuyobozi w’umurwi Hezbollah, yavuze ko abarwanyi b’uwo murwi bafise ibirwanisho bishasha, ko yamara adashaka kuvuga ivyo birwanisho ivyo ari vyo.
Yavuze ko umwansi wabo azi neza ko biteguye bikomeye. Umutegetsi mukuru w’igisirikare ca Israyeri, Liyetena Jenerali, Herzi Halevi, ku ruhande rwiwe, yavuze ko igihugu ciwe kizi neza ibirwanisho umurwi Hezbollah ufise. Yabitangaje mu rugendo yagize hafi y’urubibe Israyeri ihana na Libani.
Yavuze ko umwansi wa Israyeri azi igice gitoyi cane c’ubushobozi igihugu ciwe gifise, ko azobubona igihe bizoba bikenewe.
Israyeri n’umurwi Hezbollah ucuditse n’umurwi Hamas vyaratanye mu mitwe akatari gake kuva mu kwezi kw’icumi kw’umwaka urangiye, igihe ingwano hagati ya Israyeri n’umurwi Hamas yaduka.
Kuva mu ntango z’umwaka, abantu barenga 400 barishwe muri Libani, benshi muribo ni abarwanyi b’umurwi Hezbollah. Yamara hari n’abasivile batari musi ya 80 bapfuye. Muri Israyeri abasirikare 16 n’abasivile 11 barishwe mu ngwano hagati y’ico gihugu n’umurwi Hezbollah.
Forum