Ishirahamwe mpuzamakungu ritangaza ko intambara kw'isi zihitanye abana incuro zitatu mu mwaka w'i 2023 kurusha mu mwaka w'imbere yaho. Ni mu gihe izo ntamara zahitanye abapfasoni incuro zibiri mu mwaka w'i 2023 kurusha umwaka w'imbere yaho.
Umutegetsi mukuru ajejwe agateka ka muntu mw’ishirahamwe ONU, Volker Turk, yatangaje ko impande zitana mu mitwe, zitera zitubahariza kurushiriza ubuzima bw’abandi mu guhonyanga agateka kabo uko zishakiye. Yavuze ko kwica no gukomeretsa abasivile ari ibintu biba imisi yose.
Turk yavuze ko abana baraswa, ibitaro bigasamburwa n’ababombe, mu gihe vya muzinga bikomeye biraswa mu bice bizima bibamwo abasivile. Yasiguye ko ivyo bikoranwa n’urwanko n’inzigo n’ukudasonera na gato ubuzima bw’ikiremwa muntu.
Umutegetsi mukuru ajejwe agateka ka muntu mw’ishirahamwe ONU, Volker Turk, yatangaje ko ibiro vyiwe vyatororokanije ibiharuro vyerekana ko mu mwaka urangiye, igitigiri c’abasivile bishwe mu ntambara mu bice bitandukanye vyo
kw’isi vyiyongeye ibice 72 kw’ijana. Yavuze ko ivyo biharuro vyerekana ko ibitigiri vy’abapfasoni bishwe mu mwaka w’i 2023 vyiyongeye incuro zibiri, mu gihe ivy’abana vyiyongeye incuro zitatu, umuntu bigereranije n’ivyo mu mwaka w’imbere yaho. Volker Turk yavuze ko ababazwa cane n’ukugene impande zirwana mu ntara ya Gaza zitubahiriza amategeko mpuzamakungu yerekeye agateka ka munutu n’ayubahiriza abasivile mu ntara ya Gaza.
Uretse intara ya Gaza, Volker Turk yavuze no ku ntambara zitari nke ziha inkumbi ku basivile mu bihugu vya Ukraine, Republika ya demokrasi ya Kongo, Sudani na Siriya. (AFP)
Forum