Muri Leta zunze ubumwe z’Amerika, polisi yataye muri yombi abantu benshi bari mu myigarambyo yo kwamagana intambara yo muri Gaza kuri kaminuza UCLA yo muri California.
Mu gitondo cya kare kuri uyu wa kane, abayobozi ba kaminuza batangaje ko iyo myigaragambyo inyuranyije n’amategeko bategeka abigaragambyaga kuhava.
Polisi yabyinjiyemo nyuma y’uko mw’ijoro ryo kuwa kabiri rishyira kuwa gatatu, abigaragambyaga bashyigikiye Isiraheli, bakomeje gutera ibintu bitandukanye, itsindi rishyigikiye abanyepalestina banagerageza gusenya za bariyeri zashyizweho.
Iri tsinda ryigaragambyaga ryasabaga ko kaminuza UCLA yitandukanya na Isiraheli.Umuyobozi w’iyi kaminuza, Gene Block, yamaganye icyo yise “itsinda ryabaye imbarurutso y’urugomo” rwo mw’ijoro ry’ejo kuwa gatatu.
Imyigaragambyo ibera kuri kaminuza ya UCLA, ni imwe muri myinshi ibera kuri za kaminuza zitandukanye mu gihugu, aho abantu amagana batawe muri yombi.
Abayobozi kuri kaminuza ya Columbia mu mujyi wa New York, ejo kuwa gatatu bavuze ko ibikorwa byose bijyanye n’amasomo y’iki gihembwe, cyari hafi kurangira, azakorerwa hanze y’ikigo mu buryo bw’iyakure, nyuma y’uko habaye imyigaragambyo yatumye n’inyubako ya kaminuza yigarurirwa n’abigaragambyaga.
Polisi mw’ijoro ryo kuwa kabiri, yirukanye abigaragambyaga kuri iyo kaminuza ya Columbia, kandi yataye muri yombi abantu bagera muri 300.
Forum