Polisi muri Afurika y’epfo, irimo gukora iperereza rigamije kureba niba ishyaka ry’uwahoze ari Perezida Jacob Zuma, ryarahimbye amasinya y’abayoboke kugirango ryiyandikishirije itora rizaba mu gihugu mu kwezi gutaha.
Iryo perereza rishya kw’ishyaka, MK, rije nyuma y’uko ikinyamakuru cy’igihugu, ku cyumweru gitangaje ko umuyobozi wahoze muri iryo shyaka yabwiye polisi ko habaye igikorwa gisesuye cyo guhimba amwe mu masinya 15.000 yari akenewe kugirango ishyaka ryiyandikishirize itora.
Komisiyo yigenga y’amatora muri Afurika y’epfo yasabye iryo perereza. Ejo kabiri komiseri wa polisi y’igihugu, jenerali Fannie Masemola, yavuze ko ryatangijwe mu mujyi wa Cape Town, ahavugwa ko guhimba amasinya byabereye. Yavuze ko iperereza rishobora kugaragaza niba bigize icyaha, abashinjacyaha bakurikirana.
Ishyaka MK, ryakunze guhura n’ibirego imbere y’amategeko, mu bijyanye no kumenya niba ryo ubwaryo na Zuma, baba bafite uburenganzira imbere y’amategeko bwo kwiyamamaza mu matora yo kw’itariki ya 29 y’uku kwezi kwa gatanu. Rishobora kuzaba ari ryo tora rifatika ugereranyije n’ayandi yabaye muri Afurika y’epfo mu myaka 30 ishize. (AP)
Forum