Ibiro vy’ishirahamwe mpuzamakungu vyitaho amagara y’abantu OMS, vyemeje ubwa mbere ko ingwara y’akaranda iva ku nguge “Mpox”, iriko irandukira abanyagihugu muri Republika iharanira Demokrasi ya Kongo, bivuye mu guhuza ibitsina.
OMS yemeje iyo nkuru mw’itangazo ryasohotse ejo ku musi wa kane, rivuga ko umunyagihugu akomoka mu Bubirigi yagendeye Kongo mu kwezi kwa gatatu, yanduye umugera w’iyo ngwara, akimara gushikayo.
Ibiro OMS bivuga kw’uyo mu Birigiri yiyemereye ko aryamana n’abandi bagabo, kandi ko yari yagiye mu butambiro bwo mu kibanza kitemewe n’amategeko, bugenderwa n’abagabo basanzwe bahuza ibitsina n’abandi bagabo.
OMS yatangaje kandi ko abantu bose bahuje ibitsina n’uyo mugabo banduye umugera w’iyo ngwara iva ku nguge.
Bubaye ubwa mbere habonetse ivyemezo nsimusiga ko iyo ngwara ishobora kwandukira biciye mu guhuza ibitsina, nk’uko bitangazwa n’Umunyanigeria, Oyewale Tomori, ari mu murwi w’abashakashatsi mw’ishirahamwe OMS.
Forum