Irushanwa rya 31 ry’umupira w’amaguru ku mugabane w’Afurika CAN 2017 riratangira uyu munsi kuwa gatandatu tariki ya 14 y'ukwezi kwa mbere 2017 muri Gabon.
Umukino wa mbere kuri uyu wa gatandatu urahuza ikipi y'igihugu cya Gabon cyakiye irushanwa na Gineya Bisawu. Undi mukino uba uyu munsi urahuza ikipi ya Kameruni na Burukina Faso. Iyi mikino yombi yo mw'itsinda rya A irabera kuri sitade nini yo mu murwa mukuru wa Gabon Libreville.
Uyu mwaka, irushanwa rizahuza amakipi 16 agabanijemo amatsinda ane. Ibyo bihugu ni Gabon, Gineya Bisawu, Alijeriya, Zimbabwe, Kote divuwari, Togo, Burukina Faso, Kameruni, Tuniziya, Senegali, Repubulika iharanira demokarasi ya Kongo, Maroko, Gana, Uganda, Mali na Misiri.
Umukino wa nyuma w'igikombe uteganijwe kubera tariki ya gatanu y'ukwezi gutaha kwa kabiri mu mujyi wa Libreville.
Iri rushanwa riba buri myaka ibiri. Ritegurwa n’ishyirahamwe ry’umupira w’amaguru muri Afurika CAF.